喺銅鑼灣鬧市中無所事事，傳嚟動聽嘅音樂，於是向崇光方向走去。只見到一個青年自彈自唱，都唔錯。隔離仲有另一個青年跳著近期大熱 – “娃娃看天下”嘅舞姿。但係完全無人欣賞，因為所有人都圍喺另一邊，另一個”表現者”。
於是好奇心作怪，又走去睇睇。幾經辛苦，從人群中望過去，見到地上有一張張長長嘅白紙，上面寫滿一個個鐵劃銀勾嘅大字。字字工整，有勁，仲有隸書，草書等等。可用台式一個字，”讚”。
從啲個中年書法家嘅背影中可以睇到，他正在努力完成另一張墨寶，圍觀嘅幾十人亦都全神貫注欣賞。突然書法家一個轉身，我都睇到啦。。。原來書法家係沒有一對手嘅。
只見他心思地放好剛完成的作品，再用他已經痿縮嘅雙臂純熟地準備另一張白紙，用紙鎮壓好位置，”夾”起支毛筆，點墨，又一次像奇蹟般寫字。
只覺得突然眼濕濕，因為眼前嘅書法家係幾咁努力，真係殘而不廢。而我地正常人又殘，又廢，又懶，又眼角高，又自私，又唔識用毛筆，又唔識”寫”自己嘅文字（淨係識”打”）。。。下刪一百字。
書法家再完成一張作品，要停低啦。圍觀嘅人冇拍手，但係都靜靜地喺銀包中挪出小小心意放喺書法家前面。有眼濕濕嘅我，有眼濕濕嘅少女，亦有眼濕濕正在教仔嘅媽咪。
人群散去，鬧市中再走過跳”娃娃看天下”嘅青年，可能有點不公平，但睇住佢喺心裡有個疑惑 –
“你真正努力過嗎？”
M.Y. Lessons Learnt 